Это первое известное сочинение на русском языке,
шедевр ораторского искусства, написано между
1037 и 1050 гг. митрополитом Иларионом --
первым русским, возведённым на Киевскую кафедру.
-------------------------------------------------------------------


О ЗАКОНЕ, МОИСTОМЪ ДАНЕЕМЪ, И О БЛАГОДЕТИ И ИСТИНЕ,
ИСУСОМЪ ХРИСТОМЪ БЫВШИЙ И КАКО ЗАКОНЪ ОТИДЕ,
БЛАГОДЕТЬ ЖЕ И ИСТИНА ВСЮ ЗЕМЛЮ ИСПОЛНИ,
И ВЕРА ВЪ ВСЯ ЯЗЫКЫ ПРОСТРЕСЯ И ДО НАШЕГО
ЯЗЫКА РУСКАГО, И ПОХВАЛА КАГАНУ НАШЕМУ ВЛОДИМЕРУ,
ОТ НЕГОЖЕ КРЕЩЕНИ БЫХОМЪ,
И МОЛИТВА КЪ БОГУ ОТ ВСЕА ЗЕМЛЯ НАШЕА

Господи, благослови, отче.

"Благословленъ Господь Богь Израилевъ", Богъ христианескъ, "яко 
посети и сътвори избавление людемь своимъ", яко не презре до конца твари 
своеа идольскыимъ мракомъ одержиме быти и бесовьскыимъ служеваниемь 
гыбнути. Нъ оправде прежде племя Авраамле скрижальми и закономъ, 
послежде же сыномъ своимъ вся языкы спасе Евангелиемь и крещениемь, 
въводя а въ обновление пакыбытиа, въ жизнь вечьную.

Да хвалимъ его убо и прославляемь хвалимааго от ангелъ 
беспрестани, и поклонимся ему, емуже покланяются херувими и серафими, 
яко, призря, призре на люди своа и не солъ, ни вестникъ, нъ Самъ спасе 
ны, не привидениемь пришедъ на землю, но истинно, пострадавъ за ны 
плотию и до гроба и съ собою въскресив ны.

Къ живущиимъ бо на земли человекомъ въ плоть одевься приде, къ 
сущиимъ же въ аде распятиемь и въ гробе полежаниемь съниде, да обои, и 
живии и мертвии познають посещение свое и Божие прихождение и 
рзумеють, яко тъ есть живыимъ и мертвыимъ крепокъ и силенъ Богъ.

Кто бо великъ, яко Богъ нашь. Тъ единъ творяи чюдеса, положи 
законъ на проуготование истине и благодети, да въ немь обыкнеть 
человечьско естьство, от многобожества идольскааго укланяяся, въ единого 
Бога веровати, да яко съсудъ скверненъ человечьство, помовенъ водою, 
закономъ и обрезаниемь, прииметь млеко благодети и крещениа.

Законъ бо предътечя бе и слуга благодети и истине, истина же 
и благодеть слуга будущему веку, жизни нетленнеи. Яко законъ 
привождааше възаконеныа къ благодетьному крещению, крещение же сыны 
своа препущаеть на вечную жизнь. Моисе бо и пророци о Христове 
пришествии поведааху, Христос же и апостоли его о въскресении и о 
будущиимъ веце.

Еже поминати въ писании семь и пророчьскаа проповеданиа о 
Христе, и апостольскаа учениа о будущиимъ веце, то излиха есть и на 
тъщеславие съкланяяся. Еже бо въ инех книгах писано и вами ведомо ти сде 
положити, то дръзости образъ есть и славохотию. Ни къ неведущиимъ бо 
пишемь, нъ преизлиха насыштьшемся сладости книжныа, не къ врагомъ 
Божиемь иноверныимъ, нъ самемь сыномъ его, не къ странныимъ, нъ къ 
наследникомъ небеснаго царьства. Но о законе, Моисеемь данеемь и о 
благодети и истине, Христосомъ бывшии, повесть си есть, и что успе законъ, 
что ли благодеть.

Прежде законъ, ти по томь благодеть, прежде стень, ти по томь 
истина. Образъ же закону и благодети Агаръ и Сарра, работнаа Агаръ и 
свободнаа Сарра, работнаа прежде, ти потомь свободнаа, да разумееть, 
иже чтеть!

Яко Авраамъ убо от уности своей Сарру име жену си, свободную, а 
не рабу, и Богъ убо прежде векъ изволи и умысли сына своего въ миръ 
послати и темь благодети явитися.

Сарра же не раждааше, понеже бе неплоды. Не бе неплоды, нъ 
заключена бе Божиимъ промысломъ на старость родити. Безвестьная же и 
таинаа премудрости Божий утаена бяаху ангелъ и человекъ, не яко неявима, 
нъ утаена и на конець века хотяща явитися.

Сарра же глагола къ Аврааму: "Се заключи мя Господь Богъ не 
раждати, вълези убо къ рабе моеи Агари и родиши от нее". Благодеть же 
глагола къ Богу: "Аще несть времене сънити ми на землю и спасти миръ, 
съниди на гору Синаи и законъ положи".

Послуша Авраамъ речи Саррины и вълезе къ рабе ее Агаре. Послуша 
же и Богъ яже от благодети словесъ и съниде на Синаи.

Роди же Агаръ раба от Авраама, раба робичишть, и нарече Авраамъ 
имя ему Измаилъ. Изнесе же и Моисеи от Синаискыа горы законъ, а не 
благодеть, стень, а не истину.

По сихъ же уже стару сущу Аврааму и Сарре, явися Богъ Аврааму, 
седящу ему пред дверьми кушке его въ полудне у дуба Мамьвриискааго. 
Авраамъ же текъ въ сретение ему поклонися ему до земле и приятъ и в 
кушту свою. Веку же сему къ коньцу приближающуся посетить Господь 
человечьскааго рода и съниде съ небесе, въ утробу Девици въходя. Приятъ 
же и Девица съ покланяниемь въ кущу плътяную, не болевьши, глаголющи 
ти къ ангелу: "Се раба Господня, буди мне по глаголу твоему".

Тогда убо отключи Богъ ложесна Саррина, и, заченьши, роди Исаака, 
свободьнаа свободьнааго. И присетивьшу Богу человечьска естьства, явишася уже 
безвестнаа и утаенаа и родися благодеть, истина, а не законъ, сынъ, а не рабъ.

И ако отдоися отрочя Исаакъ и укрепе, сътвори Авраамъ гоститву 
велику, егда отдоися Исаакъ сынъ его. Егда бе Христос на земли, и еще не у
ся благодеть укрепила бяаше, нъ дояшеся, и еще за 30 летъ, въ ня же 
Христосъ таяашеся. Егда же уже отдоися и укрепе и явися благодеть Божиа 
всемъ человекомъ въ Иорданьстеи реце, сътвори Богь гоститву и пиръ 
великъ тельцемь упитеныим от века, възлюбленыимъ Сыномъ своимъ Исусом 
Христомь, съзвавъ на едино веселие небесныа и земныа, съвокупивъ въ 
едино ангелы и человекы.

По сихъ же видевши Сарра Измаила, сына Агариина, играюща съ 
сыномъ своимъ Исакомъ, и ако приобиденъ бысть Исаакъ Измаиломъ, рече 
къ Аврааму: "Отжени рабу и съ сыномъ ее, не имать бо наследовати сынъ 
рабынинъ сына свободныа". По възнесении же Господа Исуса, ученикомъ 
же и инемь веровавшиимъ уже въ Христа сущемь въ Иерусалиме, и обоимъ 
съмесь сущемь, иудеомъ же и христианомъ, и крещение благодатьное обидимо 
бяаше от обрезаниа законьнааго, и не приимаше въ Иеросалиме христианьскаа 
церкви епискупа необрезана, понеже, стареише творящеся, сущеи
отъ обрезаниа насиловааху на хрестианыа, рабичишти на сыны свободныа, и 
бывааху междю ими многы распре и которы. Видивши же свободьнаа 
благодеть чада своа христианыи обидимы от иудеи, сыновъ работнааго закона, 
възъпи къ Богу: "Отжени иудеиство и съ закономъ расточи по странамъ, кое 
бо причастие стеню съ истиною, иудеиству съ христианьством".

И отгнана бысть Агаръ раба съ сыномъ ее Измаиломъ, и Исаакъ, 
сынъ свободныа, наследникъ бысть Аврааму, отцу своему. И отгнани быша 
иудеи и расточени по странам, и чяда благодетьнаа христиании наследници 
быша Богу и Отцу. Отиде бо светъ луны, солнцю въсиавъшу, тако и законъ, 
благодети явльшися, и студеньство нощьное погыбе, солнечьнеи теплоте 
землю съгревши. И уже не гърздится въ законе человечьство, нъ въ благодети 
пространо ходить.

Иудеи бо при свешти законнеи делааху свое оправдание, християни 
же при благодетьнеим солнци свое спасение зиждють. Яко иудеиство 
стенемь и закономъ оправдаашеся, а не спасаашеся, хрьстиани же истиною и 
благодатию не оправдаються, нъ спасаються.

Въ иудеихъ бо оправдание, въ христианыихъ же спасение. Яко оправдание 
въ семь мире есть, а спасение въ будущиимъ веце. Иудеи бо о 
земленыих веселяахуся, христиани же о сущиихъ на небесехъ. И тоже
оправдание иудеиско скупо бе зависти ради, не бо ся простирааше въ ины языкы, 
нъ токмо въ Иудеи единой бе. Христианыихъ же спасение благо и щедро 
простираяся на вся края земленыа.

Събысться благословение Манасиино на июдеихъ, Ефремово же на 
христьяныих. Манасиино бо стареишиньство левицею Иаковлею благословлено 
бысть. Ефремово же мнишьство десницею. Аще и стареи Манасии 
Ефрема, нъ благословлениемь Иаковлемь мнии бысть. Тако иудеиство, аще 
прежде бе, нъ благодетию христианин больше быша.

Рекшу бо Иосифу къ Иакову: "На семь, отче, положи десницу, яко сь 
стареи есть", отвеща Иаковъ: "Веде, чядо, веде. И тъ будеть въ люди и 
възнесется, нъ братъ его мении болии его будеть, и племя его будеть въ 
множьство языкъ".

Яко же и бысть. Законъ бо прежде бе и възнесеся въ мале, и отииде 
Вера же христианьская, послежде явльшися, больши первыа бысть и расплодися 
на множьство языкъ. И Христова благодеть всю землю обятъ и ако вода 
морьскаа покры ю. И вси, ветъхая отложьше, обетъшавъшая завистию иудеискою, 
новая держать, по пророчьству Исаину: "Ветхая мимоидоша, и новая 
вамъ възвещаю; поите Богу песнь нову, и славимо есть имя его от конець 
земли, и съходящеи въ море, и плавающеи по нему, и острови вси". И пакы:
"Работающимъ ми наречется имя ново, еже благословится на земли, 
благословять бо Бога истиньнааго".

Прежде бо бе въ Иеросалиме единомь кланятися, ныне же по 
всеи земли. Яко же рече Гедеонъ къ Богу: "Аще рукою моею спасаеши 
Израиля, да будеть роса на руне токмо, по всеи же земли суша". И 
бысть тако. По всеи бо земли суша бе прежде, идольстеи льсти языкы 
одержашти и росы благодетьныа не приемлющемь. Въ Иудеи бо тъкмо 
знаемь бе Богь, и "въ Израили велие имя его", и въ Иеросалиме 
единомь славемь бе Богъ.

Рече же пакы Гедеонъ къ Богу: "Да будеть суша на руне токмо, по 
всеи же земли роса". И бысть тако. Иудеиство бо преста и законъ отиде, 
жертвы неприатны, кивотъ и скрижали, и оцестило отъято бысть По всеи
же земли роса, по всеи бо земли вера простреся, дождь благодетныи оброси, 
купель пакыпорождениа сыны своа въ нетление облачить.

Яко же и къ самаряныни глаголааше Спасъ, яко грядеть година, 
и ныне есть, егда ни во горе сеи, ни въ Иеросалимехъ поклонятся Отцу, 
но будуть истиннии поклонници, иже поклонятся Отцу духомь и истиною, 
ибо Отец тацехъ ищеть кланяющихся ему, рекше съ Сыномъ и съ Святыим 
Духомъ,- яко же и есть. По всеи земли уже славится Святаа Троица 
и покланяние приемлеть от всеа твари, малии, велиции славять Бога, по 
пророчьству: "И не научить кождо искреняго своего и человекъ брата 
своего, глаголя "познаи Господа", яко уведять мя от малыих до великааго". 
Яко же и Спасъ Христос къ Отцу глаголааше: "Исповедаю ти ся, Отче, 
Господеви небеси и земли, яко утаилъ еси от премудрыихъ и разумныихъ 
и открылъ еси младенцемь, еи, Отче, яко тако бысть благоизволение пред 
тобою".

И толма помилова благыи Богъ человечьскыи род, яко и человеци 
плотьнии крещениемь и благыими делы сынове Богу и причастници Христу 
бывають. Елико бо рече евангелистъ: "Прияша его, дасть имъ власть чядомъ 
Божиемъ быти, веру яштиимъ въ имя его, иже не отъ кръве ни отъ похоти
плотьскы, ни отъ похоти мужескы, нъ отъ Бога родишася", Святыимь 
Духъмъ въ святеи купели.

Вся же си Богь нашь на небеси и на земли елико въсхоте, и 
сътвори. Темже къто не прославить, къто не похвалить, къто не 
поклониться величьству славы его и къто не подивиться бесчисльному 
человеколюбию его.

Прежде векъ от Отца рожденъ, единъ състоленъ Отцу, единосущенъ, 
яко же солнцу светъ, съниде на землю, посети людии своих, не 
отлучивъся Отца, и въплотися отъ Девице чисты, безмужны и бесквернены, 
въшедъ, яко же самъ весть. Плоть приимъ, изиде, яко же и въниде.

Един сыи от Троице въ две естьств: Божество и человечьство, 
исполнь человекъ по въчеловечению, а не привидениемь, нъ исполнь Богь по 
божеству, а не простъ человекъ показавыи на земли божьскаа и 
человечьскаа:

яко человекъ бо утробу матерьню растяше, и яко Богъ изиде, 
девьства не вреждь;

яко человекъ матерьне млеко приатъ, и яко Богъ пристави ангелы 
съ пастухы пети: "Слава въ вышниихъ Богу";

яко человекъ повиться въ пелены, и яко Богъ вълхвы звездою ведяаше;

яко человекъ възлеже въ яслехъ, и яко Богъ от волхвъ дары и 
поклонение приатъ;

яко человекъ бежааше въ Египетъ, и яко Богу рукотворениа 
египетъскаа поклонишася;

яко человекъ прииде на крещение, и ако Бога Иорданъ устрашився, 
възвратися;

яко человекъ, обнажився, вълезе въ воду, и ако Богъ от Отца 
послушьство приатъ: "Се есть Сынъ мои възлюбленыи",

яко человекъ постися 40 днии и възалка, и яко Богъ побъди искушающаго;

яко человекъ иде на бракъ Кана Галилеи, и ако Богъ воду въ вино 
приложи;

яко человекъ въ корабли съпааше, и ако Богъ запрети ветромъ и 
морю, и послушашя его;

яко человекъ по Лазари прослезися, и ако Богъ въскреси и от мертвыихъ;

яко человекъ на осля въседе, и ако Богу звааху: "Благословленъ 
Грядыи въ имя Господне!";

яко человекъ распятъ бысть, и ако Богъ своею властию съпропятааго 
съ нимъ въпусти въ раи;

яко человекъ оцьта въкушь, испусти духъ, и ако Богь солнце помрачи 
и землею потрясе;

яко человекъ въ гробе положенъ бысть, и ако Богь ада раздруши и 
душе свободи;

яко человека печатлеша въ гробе, и ако Богь изиде, печати целы 
съхрань;

яко человека тъщаахуся иудеи утаити въскресение, мьздяще стражи,
нъ яко Богь уведеся и познанъ бысть всеми конци земля.

По истине, "кто Богъ велии яко Богь нашь"! Тъ есть "Богь творяи 
чюдеса", съдела "спасение посреде земля" крестом и мукою на месте 
лобнемь, въкусивъ оцта и зълчи, да сластнааго въкушениа Адамова еже от 
древа преступление и грех въкушениемь горести проженеть.

Си же сътворьшеи ему претъкнушася о нь, акы о камень, и съкрушишася, 
яко же Господь глаголааше: "Падыи на камени семь съкрушится, а 
на немь же падеть, съкрушить и".

Прииде бо к нимъ, исполняа пророчьства, прореченаа о немь, 
яко же и глаголааше: "Несмь посланъ, тъкмо къ овцамъ погыбшиимъ 
дому Израилева", и пакы: "Не приидохъ разоритъ закона, нъ исполнить",
и къ хананеи иноязычници, просящи исцелениа дъщери своеи, 
глаголааше: "Несть добро отъяти хлеба чядомъ и поврещи псомъ". 
Они же нарекоша сего лестьца и от блуда рождена, и о Велизевуле
бесы изгоняща.

Христосъ слепыа ихъ просвети, прокаженыа очисти, слукыа исправи, 
бесныа исцели, раслабленыа укрепи, мертвыа въскреси. Они же 
яко злодеа мучивше, кресте пригвоздиша. Сего ради прииде на ня гневъ 
Божий конечныи.

Яко же и сами послуствоваша своеи погыбели. Рекшу Спасу притьчю 
о винограде и о делателех: что убо сътворить делателемь темь, 
отвещаша: "Злы зле погубить я и виноградъ предасть инемь делателемь, 
иже въздадять ему плоды въ времена своа",- и сами своей погыбели 
пророци быша.

Приде бо на землю, посетить ихъ и не приаша его, понеже дъла 
ихъ темна бяаху, не възлюбиша света, да не явятся дела ихъ яко 
темьна суть.

Сего ради приходя Исусъ къ Иеросалиму, видевъ градъ, прослезися о 
немъ, глаголя, яко: "Аще бы разумелъ ты въ день твои сь яже къ миру 
твоему. Ныне же съкрыся отъ очию твоею, яко приидуть дение на тя, и 
обожять врази твои острогъ о тобъ, и обидуть тя и обоимуть тя всюду, и 
разбиють тя и чада твоа въ тобе, понеже не разуме времене посещениа 
твоего". И пакы: "Иерусалимъ, Иерусалимъ, избивающиа пророкы и камениемь 
побивающи посланыа к тобе! Колижды въсхотех събьрати чяда твоа,
яко же събираеть кокошь птеньце под криле свои, и не въсхотесте. Се 
оставляется домъ вашь пустъ!"

Яко же и бысть. Пришедъше бо римляне, плениша Иерусалимъ и 
разбиша и до основаниа его. Иудейство оттоле погыбе, и законъ по семь, яко 
вечерьнеи заре, погасе, и расеяни быша иудеи по странамъ, да не въкупь 
злое пребываеть.

Приде бо Спасъ и не приать бысть от Израиля, и, по евангельскому 
слову, "въ своа прииде и свои его не приаша". От языкъ же приать бысть. 
Яко же рече Иаковъ: "И тъ чаяние языкомъ". Ибо и въ рождении его вълсви 
от языкъ прежде поклонишася ему, а иудеи убити его искааху, его же ради и 
младенця избиша.

И събысться слово Спасово, яко: "Мнози ото въстокъ и западъ приидуть 
и възлягнуть съ Авраамомъ и Исакомъ и Иаковомъ въ царствии небеснемь, 
а сынове царьствиа изгнани будуть въ тму кромешнюю". И пакы, яко:
"Отимется от вас царство Божие и дасться странамъ, творяшиимъ плоды его".

Къ ним же посла ученикы своа, глаголя: "Шедъше въ весь миръ, 
проповедите Евангелие всей твари. Да иже веруеть и крьститься, спасенъ 
будеть". И: "Шьдъше, научите вся языкы, крестяще я въ имя Отца и Сына и 
Святаго Духа, учаще я блюсти вся, елика заповедах вамъ".

Лепо бе благодати и истине на новы люди въсиати. Не въливають бо, 
по словеси Господню, вина новааго учениа благодетьна въ мехы ветхы, 
обетшавъши въ иудеистве, "аще ли, то просядутся меси и вино пролеется". Не 
могъше бо закона стеня удержати, но многажды идоломъ покланявшеся, како 
истинныа благодети удержать учение. Нъ ново учение - новы мехы, новы 
языкы! "И обое съблюдется".

Яко же и есть. Вера бо благодетьнаа по всеи земли простреся и до 
нашего языка рускааго доиде. И законное езеро пресъше, евангельскыи же 
источникъ наводнився и всю землю покрывъ, и до насъ разлиася. Се бо уже 
и мы съ всеми христиаными славимъ Святую Троицу, и Иудеа молчить;
Христос славимъ бываеть, а иудеи кленоми; языци приведени, а иудеи 
отриновени. Яко же пророкъ Малахиа рече: "Несть ми хотениа въ сынехъ 
Израилевех, и жерты от рукъ ихъ не прииму, понеже ото въстокъ же и западъ имя 
мое славимо есть въ странахъ и на всякомъ месте темианъ имени моему 
приносится, яко имя мое велико въ странах". И Давыдъ: "Вся земля да 
поклонить ти ся и поеть тобе". И: "Господи, Господь нашь, яко чюдно имя 
твое по всей земли".

И уже не идолослужителе зовемся, нъ христиании, не еще безнадежници, 
нъ уповающе въ жизнь вечную. И уже не капище сътонино съграждаемь, 
нъ Христовы церкви зиждемь, уже не закалаемь бесомъ другъ друга, нъ 
Христос за ны закалаемь бываеть и дробимъ въ жертву Богу и Отьцю. И уже 
не жерьтвеныа крове въкушающе, погыбаемь, нъ Христовы пречистыа крове 
въкушающе, съпасаемся.

Вся страны благыи Богъ нашь помилова и насъ не презре, въсхоте и 
спасе ны, и въ разумъ истинный приведе.

Пусте бо и пресъхле земли нашей сущи, идольскому зною исушивъши ю, 
вънезаапу потече источникъ евангельскыи, напаая всю землю нашу.
Яко же рече Исаиа: "Разверзется вода ходящиимъ по бездне, и будеть 
безводнаа въ блата, и въ земли жажущии источникъ воды будеть".

Бывшемъ намъ слепомъ и истиннааго света не видящемь, нъ въ 
льсти идольстии блудящемь, къ сему же и глухомъ от спасенааго учениа, 
помилова ны Богъ - и въсиа и въ насъ светъ разума, еже познати его, 
по пророчьству: "Тогда отверзутся очеса слепыих и ушеса глухыих 
услышать".

И потыкающемся намъ въ путех погыбели, еже бесомъ въследовати и 
пути, ведущааго въ живот, не ведущемь, къ сему же гугънахомъ языкы 
нашими, моляще идолы, а не Бога своего и творца, посети насъ 
человеколюбие Божие. И уже не последуемь бесомъ, нъ ясно славимъ Христа 
Бога нашего, по пророчьству: "Тогда скочить, яко елень, хромыи, и ясенъ 
будеть языкъ гугнивыих".

И прежде бывшемь намъ яко зверемь и скотомъ, не разумеющемь 
деснице и шюице и земленыих прилежащем, и ни мала о небесныих 
попекущемся, посла Господь и къ намъ заповеди, ведущаа въ жизнь 
вечную, по пророчьству Иосиину: "И будеть въ день онъ, глаголеть Господь, 
завещаю имъ заветъ съ птицами небесныими и зверьми земленыими и 
реку не людем моимъ: "людие мои вы", и ти ми рекуть: "Господь Богъ 
нашь еси ты".

И тако странни суще, людие Божии нарекохомся, и врази бывше, 
сынове его прозвахомъся.

И не иудеискы хулимъ, нъ христианьскы благословимъ;

не совета творим, яко распяти, нъ яко Распятому поклонитися;

не распинаемь Спаса, нъ рукы к нему въздеваемь;

не прободаемь ребръ, нъ от них пиемь источьникъ нетлениа;

не тридесяти сребра възимаемь на немь, нъ "другъ друга и весь 
животъ нашь" тому предаемь;

не таимъ въскресениа, нъ въ всех домех своих зовемь: "Христос 
въскресе изъ мертвыих";

не глаголемь, яко украденъ бысть, но яко възнесеся, идеже и бе;

не неверуемь, нъ яко Петръ къ нему глаголемь: "Ты еси Христос, 
сынъ Бога живааго", съ Фомою: "Господь нашь и Богъ ты еси", съ 
разбоиникомъ: "Помяни ны, Господи, въ царствии своемь".

И тако верующе къ нему и святыихъ отець седми съборъ предание 
держаще, молимъ Бога и еще и еще поспешити и направити ны на путь 
заповедии его!

И събысться о насъ языцех реченое: "Открыеть Господь мышьцу свою 
святую предъ всеми языкы, и узрять вси конци земля спасение, еже от Бога 
нашего.

И другое: "Живу азъ, глаголеть Господь, яко мне поклонится всяко 
колено, и всякъ языкъ исповесться Богу";

и Исаино: "Всяка дебрь исполнится и всяка гора и холмъ съмерится, 
и будуть криваа въ праваа, и острии въ пути гладъкы, и явится слава 
Господня, и всяка плоть узрить спасение Бога нашего";

и Данииле: "Вси людие, племена и языци тому поработають";

и Давыдъ: "Да исповедатся тобе людие, Боже, да исповедатся тобе 
людие вси! Да възвеселятся и възрадуются языци!";

и: "Вси языци въсплещете руками и въскликнете Богу гласомъ радости, 
яко Господь вышнии страшенъ, царь великъ по всеи земли";

и по мале: "Поите Богу нашему, поите; поите цареви нашему, поите, 
яко царь всеи земли Богъ, поите разумно. Въцарися Богь надъ языкы";

и: "Вся земля да поклонить ти ся и поеть тобе, да поеть же имени 
твоему, Вышнии";

и: "Хвалите Господа вси языци, и похвалите вси людие";

и еще: "От въстокъ и до западъ хвално имя Господне. Высокъ надъ 
всеми языкы Господь, надъ небесы слава его";

"По имени твоему, Боже, тако и хвала твоа на коньцих земля";

"Услыши ны, Боже, Спасителю нашь, упование всемъ концемь земли 
и сущиимъ въ мори далече";

и: "Да познаемь на земли путь твои и въ всехъ языцех спасение 
твое";

и: "Царие земьстии и вси людие, князи и вси судии земьскыи, 
юноше и девы, старци съ юнотами да хвалять имя Господне";

и Исаино: "Послушаите мене, людие мои, глаголеть Господь, и царе 
къ мне вънушите, яко законъ от мене изидеть и судъ мои светъ странамъ, 
приближается скоро правда моа, и изыдеть, яко светъ, спасение мое; мене 
острови жидуть и на мышьцю мою страны уповають".

Хвалить же похвалныими гласы Римьскаа страна Петра и Паула, 
имаже вероваша въ Исуса Христа, Сына Божиа; Асиа и Ефесъ, и 
Патмъ Иоанна Богословьца, Индиа Фому, Египетъ Марка. Вся страны и 
гради, и людие чтуть и славять коегождо ихъ учителя, иже научиша я 
православнеи веръ. Похвалимъ же и мы, по силе нашеи, малыими 
похвалами великаа и дивнаа сътворьшааго нашего учителя и наставника, 
великааго кагана нашеа земли Володимера, вънука старааго Игоря, 
сына же славнааго Святослава, иже въ своа лета владычествующе, 
мужьствомъ же и храборъствомъ прослуша въ странахъ многах, и победами 
и крепостию поминаются ныне и словуть. Не въ худе бо и неведоме
земли владычьствоваша, нъ въ Руське, яже ведома и слышима есть 
всеми четырьми конци земли.

Сии славныи от славныихъ рожься, благороденъ от благородныих, 
каганъ нашь Влодимеръ, и възрастъ и укрепевъ от детескыи младости, паче 
же възмужавъ, крепостию и силою съвершаяся, мужьствомъ же и съмыслом 
предъспеа. И единодержець бывъ земли своеи, покоривъ подъ ся округъняа 
страны, овы миромъ, а непокоривыа мечемь.

И тако ему въ дни свои живущю и землю свою пасущу правдою, 
мужьствомь же и съмысломъ, приде на нь посещение Вышняаго, призре на 
нь всемилостивое око благааго Бога, и въсиа разумъ въ сердци его, яко 
разумети суету идольскыи льсти и възыскати единого Бога, сътворьшааго всю 
тварь видимую и невидимую.

Паче же слышано ему бе всегда о благоверьнии земли Гречьске, 
христолюбиви же и сильне верою, како единого Бога въ Троици чтуть и 
кланяются, како въ них деются силы и чюдеса и знамениа, како церкви 
людии исполнены, како веси и гради благоверьни вси въ молитвах предстоять, 
вси Богови престоять. И си слышавъ, въждела сердцемь, възгоре духомъ, 
яко быти ему христиану и земли его.

Еже и бысть, Богу тако изволившу и възлюбившу человечьское естьство. 
Съвлече же ся убо каганъ нашь и съ ризами ветъхааго человека, 
съложи тленнаа, оттрясе прахъ невериа и вълезе въ святую купель. И породися 
от Духа и воды, въ Христа крестився, въ Христа облечеся, и изиде от 
купели белообразуяся, сынъ бывъ нетлениа, сынъ въскрешениа. Имя приимъ 
вечно, именито на роды и роды, Василии, имже написася въ книгы 
животныа въ вышниимъ граде и нетленнеимъ Иерусалиме.

Сему же бывьшу, не доселе стави благовериа подвига, ни о том 
токмо яви сущую въ немь къ Богу любовь. Нъ подвижеся паче, заповедавъ 
по всеи земли и крьститися въ имя Отца и Сына и Святаго Духа, и ясно 
и велегласно въ всех градех славитися Святеи Троици, и всемъ быти 
христианомъ малыим и великыимъ, рабомъ и свободныим, уныим и старыим, 
бояромъ и простыим, богатыим и убогыимъ. И не бы ни единого 
же противящася благочестному его повелению, да аще кто и не любовию, 
нъ страхом повелевшааго крещаахуся, понеже бе благоверие его съ властию 
съпряжено.

И въ едино время вся земля наша въслави Христа съ Отцемь и съ 
Святыимъ Духомъ. Тогда начать мракъ идольскыи от нас отходити, и зоре 
благовериа явишася; тогда тма бесослуганиа погыбе, и слово евангельское 
землю нашю осиа. Капища разрушаахуся, и церкви поставляахуся, идоли 
съкрушаахуся, и иконы святыих являахуся, беси пробегааху, крестъ грады 
свящаше.

Пастуси словесныихъ овець Христовъ епископи сташа пред святыимъ 
олтаремь, жертву бескверньную възносяще; попове и диакони, и весь клиросъ, 
украсиша и въ лепоту одеша святыа церкви. Апостольскаа труба и 
евангельскы громъ вси грады огласи, темианъ, Богу въспущаемь, въздух 
освяти. Манастыреве на горах сташа, черноризьци явишася. Мужи и жены, и 
малии, и велиции, вси людие, исполнеше святыя церкви, въславиша, глаголюще:
"Единъ святъ, единъ Господь, Исус Христос, въ славу Богу Отцу, 
аминь! Христос победи! Христос одоле! Христос въцарися! Христос прославися! 
Великъ еси, Господи, и чюдна дела твоа! Боже нашь, слава тебе!"

Тебе же како похвалимъ, о честный и славный въ земленыих владыках, 
премужьственыи Василие? Како доброте твоей почюдимся, крепости же 
и силе? Каково ти благодарие въздадимъ, яко тобою познахомъ Господа и 
льсти идольскыа избыхомъ, яко твоимъ повелениемь по всей земли твоеи
Христос славится? Ли что ти приречемь, христолюбче, друже правде, съмыслу 
место, милостыни гнездо?

Како верова? Како разгореся въ любовь Христову? Како въселися 
въ тя разумъ выше разума земленыихъ мудрець, еже Невидимаго 
възлюбити и о небесныихъ подвигнутися? Како възиска Христа, како 
предася ему? Повеждь намъ, рабомъ твоимъ, повеждь, учителю нашь!
Откуду ти припахну воня Святааго Духа? Откуду испи памяти будущая 
жизни сладкую чашу? Откуду въкуси и виде, "яко благъ Господь"?

Не видилъ еси Христа, не ходилъ еси по немь, како ученикъ его 
обретеся? Ини, видевше его, не вероваша, ты же, не видевъ, верова. 
Поистине бысть на тебе блаженьство Господа Исуса, реченое къ Фоме:
"Блажени не видевше и веровавше". Темже съ дрьзновениемь и несуменно зовемь 
ти о блажениче! - самому тя Спасу нарекшу. Блаженъ еси, яко верова къ 
нему и не съблазнися о немь, по словеси его нелъжнууму: "И блаженъ есть, 
иже не съблазниться о мне". Ведущеи бо законъ и пророкы распяша и, ты 
же, ни закона, ни пророкъ почитавъ, Распятому поклонися.

Како ти сердце разверзеся? Како въниде въ тя страхъ Божии? Како 
прилепися любъви его? Не виде апостола, пришедша въ землю твою и нищетою 
своею и наготою, гладомъ и жаждею сердце твое на съмерение клоняща.
Не виде бесъ изъгонимъ именемь Исусовомъ Христовомъ, болящиихъ 
съдравеють, немыихъ глаголють, огня на хладъ прилагаема, мертвыих 
въстають. Сихъ всехъ не видевъ, како верова?

Дивно чюдо! Ини царе и властеле, видяще вся си, бывающа от святыихъ 
мужь, не вероваша, нъ паче на мукы и страсти предаша ихъ. Ты же, о 
блажениче, безъ всехъ сихъ притече къ Христу, токмо от благааго съмысла и 
остроумиа разумевъ, яко есть Богъ единъ творець невидимыимъ и видимыим, 
небесныимъ и земленыимъ, и яко посла въ миръ спасениа ради възлюбенаго 
Сына своего. И си помысливъ, въниде въ святую купель. И еже инемь 
уродьство мнится, тобе сила Божиа въменися.

Къ сему же кто исповесть многыа твоа нощныа милостыня и дневныа 
щедроты, яже къ убогыимъ творяаше, къ сирыимъ, къ болящиимъ, къ 
дължныимъ, къ вдовамъ и къ всемь требующимъ милости? Слышалъ бо бе 
глаголъ, глаголаныи Данииломъ къ Науходоносору: "Съветъ мои да будеть ти 
годе, царю Науходоносоре, грехы твоа милостинями оцести и неправды твоа 
щедротами нищиихъ". Еже слышавъ ты, о честьниче, не до слышаниа стави 
глаголаное, нъ деломъ съконча, просящиимъ подаваа, нагыа одевая, жадныа 
и алчныа насыщая, болящиимъ всяко утешение посылаа, должныа искупая, 
работныимъ свободу дая.

Твоа бо щедроты и милостыня и ныне въ человецехъ поминаемы 
суть, паче же пред Богомъ и ангеломъ его. Ея же ради доброприлюбныа 
Богомъ милостыня, много дръзновение имееши къ нему, яко присный 
Христовъ рабъ. Помагаеть ми словеси рекыи: "Милость хвалится на суде". 
И: "Милостыни мужу, акы печать съ нимъ". Вернее же самого Господа 
глаголъ: "Блажени милостивии, яко ти помиловани будуть".

Ино же, яснее и вернее послушьство приведемь о тебе от Святыихъ 
писании, реченое от Иакова апостола, яко: "Обративыи грешника от 
заблуждениа пути его спасеть душу от смерти и покрыеть множество греховъ".

Да аще единого человека обративъшууму толико възмездие от благааго 
Бога, то каково убо спасение обрете, о Василие? Како бремя греховное 
расыпа, не единого обративъ человека от заблуждениа идольскыа льсти, ни 
десяти, ни града, нъ всю область сию.

Показаеть ны и уверяеть самъ Спасъ Христос, какоя тя славы и чьсти 
сподобилъ есть на небесехъ, глаголя: "Иже исповесть мя пред человекы, 
исповемь и и азъ пред Отцемь моим, иже есть на небесех". Да аще 
исповедание приемлеть о собе от Христа къ Богу Отцу исповедавыи его токмо 
пред человекы, колико ты похваленъ от него имаши быти, не токмо 
исповедавъ, яко "Сынъ Божии есть Христос", нъ и веру его уставль, не въ 
единомь съборе, нъ по всей земли сеи, и церкви Христови поставль, и 
служителя ему въведъ.

Подобниче великааго Константина, равноумне, равнохристолюбче, 
равночестителю служителемь его! Онъ съ святыими отци Никеискааго 
Събора закон человекомъ полагааше, ты же съ новыими нашими отци 
епископы сънимаяся чясто, съ многымъ съмерениемь съвещаваашеся, како 
въ человецехъ сихъ ново познавшиихъ Господа законъ уставити. Онъ въ 
елинехъ и римлянех царьство Богу покори, ты же - в Руси: уже бо и 
въ онехъ и въ насъ Христос царемь зовется. Онъ съ материю своею Еленою 
крестъ от Иерусалима принесъша и по всему миру своему раславъша, 
веру утвердиста, ты же съ бабою твоею Ольгою принесъша крестъ от 
новааго Иерусалима, Константина града, и сего по всеи земли своеи 
поставивша, утвердиста веру. Егоже убо подобникъ сыи, съ темь же единоя
славы и чести обещьника сътворилъ тя Господь на небесех благовериа 
твоего ради, еже име въ животе своемь.

Добръ послухъ благоверию твоему, о блажениче, святаа церкви Святыа 
Богородица Мариа, юже създа на правоверьнеи основе, идеже и мужьственое 
твое тело ныне лежит, жида трубы архангельскы.

Добръ же зело и веренъ послухъ сынъ твои Георгии, егоже 
сътвори Господь наместника по тебе твоему владычьству, не рушаща 
твоих уставъ, нъ утвержающа, ни умаляюща твоему благоверию 
положениа, но паче прилагающа, не казяща, нъ учиняюща. Иже 
недоконьчаная твоя наконьча, акы Соломонъ Давыдова, иже дом Божии 
великыи святыи его Премудрости създа на святость и освящение граду 
твоему, юже съ всякою красотою украси: златомъ и сребромъ, и камениемь 
драгыимъ, и съсуды честныими. Яже церкви дивна и славна 
всемь округъниимъ странамъ, яко же ина не обрящется въ всемь 
полунощии земнеемь ото въстока до запада.

И славныи градъ твои Кыевъ величьствомъ, яко венцемь, обложилъ, 
предалъ люди твоа и градъ святыи, всеславнии, скореи на помощь христианомъ 
Святеи Богородици, еи же и церковь на Великыихъ вратех създа въ 
имя первааго Господьскааго праздника - святааго Благовещениа, да еже 
целование архангелъ дасть Девици, будеть и граду сему. Къ оной бо: 
"Радуися, обрадованаа! Господь с тобою!", къ граду же: "Радуися, благоверныи 
граде! Господь с тобою!"

Въстани, о честнаа главо, от гроба твоего! Въстани, оттряси сонъ! 
Неси бо умерлъ, нъ спиши до обьщааго всемъ въстаниа. Въстани, неси 
умерлъ! Несть бо ти лепо умрети, веровавшу въ Христа, живота всему миру.
Оттряси сонъ, възведи очи, да видиши, какоя тя чьсти Господь тамо 
съподобивъ, и на земли не беспамятна оставилъ сыномъ твоимъ. Въстани, 
виждь чадо свое Георгиа, виждь утробу свою, виждь милааго своего, виждь 
егоже Господь изведе от чреслъ твоихъ, виждь красящааго столъ земли 
твоеи - и возрадуися и възвеселися!

Къ сему же виждь благоверную сноху твою Ерину, виждь вънукы 
твоа и правнукы: како живуть, како храними суть Господемь, како благоверие 
держать по предаянию твоему, како въ святыа церкви чястять, како 
славять Христа, како покланяются имени его.

Виждь же и градъ, величьством сиающь, виждь церкви цветущи, 
виждь христианьство растуще, виждь град, иконами святыихъ освещаемь и 
блистающеся, и тимианомъ обухаемь, и хвалами божественами и пении 
святыими оглашаемь. И си вься видевъ, възрадуися и възвеселися и похвали 
благааго Бога, всемь симъ строителя!

Виде же, аще и не теломъ, нъ духомъ показаеть ти Господь вся си, о 
нихъже радуйся и веселися, яко твое верное въсеание не исушено бысть
зноемь невериа, нъ дождемь Божиа поспешениа распложено бысть многоплодне.

Радуйся, въ владыкахъ апостоле, не мертвыа телесы въскрешав, 
нъ душею ны мертвы, умерьшаа недугомь идолослужениа въскресивъ! 
Тобою бо обожихомъ и Живота Христа познахомъ. Съкорчени бехомъ от 
бесовьскыа льсти и тобою прострохомся и на путь животный наступихомъ; 
слепи бехомъ сердечныими очима, ослеплени невидениемь, и тобою 
прозрехомъ на светъ трисолнечьнаго Божьства; неми бехомъ, и 
тобою проглаголахомъ. И ныне уже мали и велицеи славимъ единосущную 
Троицу.

Радуйся, учителю нашь и наставниче благоверию! Ты правдою бе
облеченъ, крепостию препоясанъ, истиною обутъ, съмысломъ венчанъ и 
милостынею яко гривною и утварью златою красуяся. Ты бе, о честнаа 
главо, нагыимъ одение, ты бе алчьныимъ кърмитель, ты бе жаждющиимъ 
утробе ухлаждение, ты бе въдовицамъ помощник, ты бе странныимъ 
покоище, ты бе бескровныимъ покровъ, ты бе обидимыимъ заступникъ, 
убогыимъ обогащение.

Имъже благыимъ деломъ и инемь възмездие приемля на небесехъ, 
блага, "яже уготова Богъ вамъ, любящиимъ его", и зрениа сладкааго лица 
его насыщаяся, помолися о земли своеи и о людех, въ нихъже благоверно 
владычьствова, да съхранить а въ мире и благоверии преданеемь тобою, и да 
славится въ нем правоверие, и да кленется всяко еретичьство, и да съблюдеть 
а Господь Богъ от всякоа рати и пленениа, от глада и всякоа скорби и 
сътуждениа!

Паче же помолися о сыне твоемь, благовернемь кагане нашемь Георгии, 
въ мире и въ съдравии пучину житиа преплути и въ пристанищи 
небеснааго заветрия пристати, невредно корабль душевны и веру съхраньшу, 
и съ богатеством добрыими делы, безъ блазна же Богомъ даныа ему люди 
управивьшу, стати с тобою непостыдно пред престоломъ Вседръжителя Бога 
и за трудъ паствы людии его приати от него венець славы нетленныа съ 
всеми праведныими, трудившиимися его ради.



МОЛИТВА

Симь же убо, о Владыко, Царю и Боже нашь, высокъи и славне, 
человъколюбче, въздаяи противу трудомъ славу же и честь и причастникы 
творя своего царьства, помяни, яко благъ, и насъ, нищиихъ твоихъ, яко имя 
тобе человеколюбець! Аще и добрыих делъ не имеемь, нъ многыа ради милости 
твоеа спаси ны, "мы бо людие твои и овце паствы твоеи", и стадо, еже 
ново начать пасти, исторгъ от пагубы идолослужения!

Пастырю добрый, положивыи душю за овце, не остави насъ, аще и 
еще блудимъ, не отверзи насъ, аще и еще съгрешаемь ти, акы новокуплении 
раби, въ всемь не угодяще Господу своему; не възгнушаися, аще и мало 
стадо, нъ рци къ намъ: "Не боися, малое стадо, яко благоизволи Отець вашь 
небесныи дати вамъ Царьствие!"

Богатыи милостию и благыи щедротами, обетщався приимати кающася 
и ожидааи обращениа грешныихъ, не помяни многыихъ грехъ нашихъ, 
приими ны обращающася к тобе, заглади рукописание съблазнъ нашихъ, 
укроти гневъ, имже рагневахомъ тя, человеколюбче, ты бо еси Господь, 
владыка и творець и в тобе есть власть или жити намъ или умрети.

Уложи гневъ милостиве, егоже достоини есмы по деломъ нашимъ, 
мимоведи искушение, яко персть есмы и прахъ и не въниди въ судъ съ рабы 
своими, мы людие твои, тебе ищемь, тобе припадаемь, тобе ся мили деемь;
съгръшихомъ и злаа сътворихомъ, не съблюдохомъ, ни съхранихомъ, якоже 
заповеда намъ!

Земнии суще, къ земныимъ преклонихомься и лукавая съдеяхом 
пред лицемь славы твоеа, на похоти плотяныа предахомся, поработихомся 
грехови и печалемь житиискамъ, быхомъ бегуни своего Владыкы. Убози 
от добрыихъ делъ, окаянии злааго ради житиа, каемся, просимъ, молимъ:
каемся злыихъ своихъ делъ, просимъ, да страхъ твои послеши въ сердца 
наша, молимъ, да на Страшнемъ Суде помилуеть ны. Спаси, ущедри, призри, 
посети, умилосердися, помилуи, твои бо есмы, твое создание, твоею 
руку дело!

"Аще бо безакониа назриши, Господи, кто постоить?" Аще въздаси 
комуждо по деломъ, то кто спасется? Яко от тебе оцещение есть, яко от тебе 
милость и много избавление, и души наши въ руку твоею, и дыхание наше 
въ воли твоеи. Донеле же-бо благопризирание твое на насъ, благоденьствуемъ, 
аще ли съ яростию призриши, ищезнемь, яко утреняа роса. Не постоить 
бо прахъ противу бури, и мы противу гневу твоему!

Нъ яко тварь от сътворивъшааго ны милости просимъ: помилуи
ны, Боже, по велицеи милости твоеи! Все бо благое от тебе на нас; все 
же неправедное от нас к тобе. Вси бо уклонихомся, вси въкупе неключими 
быхомъ, несть от насъ ни единого о небесныихъ тщащася и подвизающа, 
нъ вси о земныихъ, вси о печалех житиискыихъ: "яко оскуде преподобныих"
на земли. Не тебе оставляющу и презрящу насъ, но намъ тебе не 
възискающем, нъ видимыихъ сихъ прилежащемь. Темже боимся, егда 
сътвориши на насъ, яко на Иеросалиме, оставлешиимъ тя и не ходившиимъ 
въ пути твоа. Нъ не сътвори намъ яко и онемь по деломъ нашимъ, ни 
по грехом нашимъ въздаи намъ, нъ терпе на насъ, и еще долго терпе, 
устави гневныи твои пламень, простираюшться на ны, рабы твоа, самъ 
направляа ны на истину твою, научая ны творити волю твою. Яко ты еси
Богъ нашь, и мы людие твои, твоа чясть, твое достояние. Не въздеваемъ 
бо "рукъ наших къ богу туждему", ни последовахом лъжууму коему пророку, 
ни учениа еретичьскаа держимъ, нъ тебе призываемь истиньнааго 
Бога и къ тебе, живущему на небесехъ, очи наши възводимъ, къ тебе 
рукы наши въздеваемь, молим ти ся; отъдаждь намъ, яко благыи 
человеколюбець, помилуи ны, призываа грешникы въ покаание, и на 
Страшнемь твоемь Суде деснааго стояниа не отлучи насъ, нъ благословлениа 
праведныих причасти насъ! И донеле же стоить миръ, не наводи 
на ны напасти искушениа, ни предаи насъ въ рукы чюжиихъ, да не 
прозоветься градъ твои градъ плененъ и стадо твое "пришельци въ земли 
не своеи", да не рекуть страны: "кде есть Богъ их?", не попущаи на 
ны скорби и глада, и напрасныихъ съмертии, огня, потоплениа!

Да не отпадуть от веры нетвердии верою, малы показни, а много 
помилуи, малы язви, а милостивно исцели, въ мале оскорби, а въ скоре 
овесели, яко не трьпить наше естьство дълго носити гнева твоего, яко 
стеблие огня!

Нъ укротися, умилосердися, яко твое есть еже помиловати и спасти; 
темже продължи милость твою на людех твоихъ: ратныа прогоня, 
миръ утверди, страны укроти, глады угобзи, владыке наши огрози странамъ, 
боляры умудри, грады расили, Церковь твою възрасти, достояние 
свое съблюди, мужи и жены, и младенце спаси, сущаа въ работе, въ 
плонении, въ заточении, въ путех, въ плавании, въ темницах, въ алкоте 
и жажди и наготе - вся помилуи, вся утеши, вся обрадуи, радость творя 
имъ и телесную и душевную!

Молитвами, молениемь пречистыя ти Матери и святыихъ небесныихъ силъ, 
и Предтечи твоего и Крестителя Иоанна, апостолъ, пророкъ,   
мученикъ, преподобныихъ  и  всехъ  святыихъ  молитвами 
умилосердися на ны и помилуи ны, да милостью твоею пасоми въ 
единении веры въкупе весело и радостно славимь тя Господа нашего Исуса 
Христа съ Отцемь, съ Пресвятыимъ Духомъ, Троицу неразделну, 
единобожествену, царьствующу на небесех и на земли ангеломъ и 
человекомъ, видимеи и невидимеи твари, ныне и присно и въ векы 
веком. Аминь!



<ИСПОВЕДАНИЕ ВЕРЫ>

Верую въ единого Бога Отца вседръжителя, творца небу и земли, и 
видимыимъ, и невидимыимъ.

И въ единого Господа Исуса Христа, Сына Божия, единочадааго, 
от Отца рожденааго прежде всех векъ, Света от Света, Бога истинна
от Бога истинна, рождена, а не сътворена, единосущна Отцу, имже 
вся быша;

насъ ради человекъ, и за наше спасение съшедшааго съ небесъ, и 
въплощьшаагося от Духа Свята и Марии Девице, въчеловечьшася;

и распята за ны при Поньтестемь Пилате, страстьна и погребена;

въскресъшааго въ третии день по Писаниемь;

въшедшааго на небеса, и седяща одесную Отца;

и пакы грядуща съ славою судити живыимъ и мертвыимъ, егоже 
царствию несть конца.

И въ Духа Святааго, Господа, и животворящааго, исходящааго отъ 
Отца, иже съ Отцемь и съ Сыномъ съпокланяемь и съславимъ, глаглавшаго 
пророкы.

Въ едину святую, съборную и апостольскую церковь.

Исповедаю едино крещение въ оставление гръховъ;

чаю въскръшениа мертвыимъ

и жизни будущааго века. Аминь.

Верую въ единого Бога, славимаго въ Троици: Отца нерождена, безначала, 
бесконечна. Сына же рождена, събезначална же и бесконечна. Духа 
Свята, исходяща изъ Отца и въ Сыне являющася, събезначальна же такожде 
и равна Отцу и Сыну,- Троицу единосущну, лици же разделяющуся, Троицу 
имены, единаго же Бога.

Не съливаю разделениа, ни съединениа разделяю, съвокупляются 
несмесно и разделяются неразделне. Отець бо нарицается, понеже не рожденъ; 
Сынъ же - рождениа ради; Духъ же Святыи - исхода ради, нъ 
неотходенъ. Не бываеть же Отець Сынъ, ни Сынъ Отець, ни Духъ Святыи 
Сынъ, нъ комуждо свое несмесно суще разве Божества. Едино бо есть Божество 
въ Троици, едино господьство, едино царство, обще трисвятое от херувимъ, 
обещь поклонъ от ангелъ и человекъ, едина слава и благодарение - от 
всего мира.

Того единого Бога веде и тому верую, въ негоже имя и крестихъся:
въ имя Отца и Сына и Святааго Духа. И ако же приахъ от писаниа святыихъ 
отець, тако научихся!

И верую и исповедаю, яко Сынъ, благоволениемь Отчемь и Святааго 
Духа хотениемь, съниде на землю спасти родъ человечьскъ, небесъ и Отца не 
отлучися, и, Святааго Духа осенениемь, въселися въ утробу Девице Марии и 
зачаться, якоже самъ единъ весть, и родися бе-семене мужеска, матерь 
девицею съхрань, якоже и лепо Богу, и въ рожьство, и преже рожьства, и по 
рожьстве, Сыновьства не отложь.

На небеси бо безматеренъ, на земли же безъ отца, въздоися, яко 
человекъ, и воспитася, и бысть человекъ истиненъ, не привидениемь, нъ
истинно въ нашей плоти. Исполнь Богъ, исполнь человекъ въ две естьстве и 
хотении воли, еже бе, не отложивъ, и еже не бе, възя.

Пострада плотию, яко человекъ, мене ради и Божествомъ бе-страсти, 
яко Богъ, пребы. Умре бесьмертныи, да мене мертва оживить; съниде къ аду, 
да прадеда моего Адама въставить и обожить, и диавола съвяжеть. Въста, яко 
Богь, изиде изъ мертвыихъ, яко победитель Христос, царь мой, тридневно, и 
явлеся многъкраты ученикомъ своимъ, възиде на небеса къ Отцю, егоже не 
отлучилъся бе, и седе одесную его.

Чаю же его пакы придуща съ небесе, нъ не отай, яко же прежде, нъ 
въ славе Отьчи съ небесныими вои. Ему же мертвии гласомъ архангельскымъ 
противу изидуть; и тъ имат судити живыим и мертвыим, и въздати комуждо 
по деломъ.

Верую же и въ 7 Съборъ правоверныихъ святыихъ отець, и егоже 
извергоша, и азъ изметаю, и егоже прокляша, и азъ проклинаю; и яже 
писаниемь предаша намъ, приимаю.

Святую и преславную Девицу Марию Богородицу нарицаю, чьту же 
и съ верою покланяюся ей. И на святей иконе еи Господа моего, яко младеньца 
на лоне еи зрю - и веселюся, распята и вижду - и радуюся, въскресъша 
его и на небеса идуща съмотря - въздею руце и покланяюся ему. Тако же и 
угодникъ его святыихъ иконы видевъ, славлю Спасъшааго ихъ. Мощи ихъ съ 
любовию и верою целую и чюдеса ихъ проповедаю, и ицеления от нихъ 
приимаю.

Къ кафоликии и апостольстеи Церкви притекаю, съ верою въхожду, 
съ верою молюся, съ верою исхожду.

Тако верую и не постыжюся; и предъ народы исповедаю, и 
исповеданиа ради и душю свою положю.

Слава же Богу о всемь, строящему о мне выше силы моеа! И молите о 
мне, честнеи учителе и владыкы Рускы земля! Аминь!



<СТАВЛЕННИЧЕСКАЯ ЗАПИСЬ МИТРОПОЛИТА ИЛАРИОНА>

Азъ милостию человеколюбивааго Бога мнихъ и прозвитеръ Иларионъ 
изволениемь его от богочестивыихъ епископъ священъ быхъ и настолованъ 
въ велицемь и богохранимемь граде Кыеве, яко быти ми въ немь 
митрополиту, пастуху же и учителю.

Быша же си въ лето 6559, владычествующу благоверьному 
кагану Ярославу, сыну Владимирю. Аминь.