Это письмо написано архиепископом Новгородским Василием Каликой (1331-1352)
тверскому епископу Феодору Доброму (1342-1360), повидимому, в 1347 г.
по поводу происходивших в это время в Твери споров "о рае".
----------------------------------------------------------------------------

ПОСЛАНИЕ АРХИЕПИСКОПА НОВОГОРОДСКАГО ВАСИЛИЯ 
КЪ ВЛАДЫЦЕ ТФЕРЬСКОМУ ФЕОДОРУ

Василий, милостью Божиею архиепископъ Новагорода, священному 
епископу Феодору Тферьскому, еже о Господе брату: благодать и миръ от 
Бога-Отца, Вседержителя, и твоему священьству, и всему священному събору, 
игуменомъ, и попомъ, и детемъ твоимъ.

Понеже уведа смирение наше и святыи сбор священный, игумени, 
иереи, что ся учинило у вас въ Тфери промежи вами, в техъ людех Божиих, 
поспешениемъ и по съвету дьяволю и лихих людей, якоже бо слышахом, 
распрю, бывшюю в васъ о ономъ честномъ раю, и пребых много дний о 
взыскании исправлениа Божественаго закона. Темь, еже изысках, и се пишу 
к тебе, понеже, брате, по Божию повелению, должъни есми другъ къ другу 
посланиа творити о исправленыхъ намъ Божественых писаний отъ святых 
апостолъ и великих святитель, якоже бо те святии апостоли бес престаниа 
посланиа творяху другъ къ другу, такоже и намъ подобно есть, в нихъ бо место 
поставлени есмы. Кто во что позванъ, тотъ в томъ пребывает.

Слышахъ, брате, что повестуеши: "Рай погиблъ, в нем же был Адамъ".

Ино, брате, о того есмы погибели не слыхали, ни в Писании где обрели 
о томъ святомъ раю, но все ведаемъ от святаго Писаниа, что насади Богъ рай 
на въстоце, въ Едеме, и введе в онь человека, и заповеда ему, рекъ: "Аще 
съблюдеши слово мое - живъ будеши, аще ли преступиши - смертью да 
умреши, в ту же землю поидеши, от нея же взятъ еси". И он же преступи 
заповедь Божию, и изгнанъ бысть из рая, и плачася горко, въпия: "О, раю 
святый! И еже еси мене ради насаженый и Евгы ради затвореный! Помоли тебе 
сотворшаго и мене създавшаго, да некли твоих цветець насыщуся!" Темъ к 
нему Спасъ глаголя: "Моего създаниа не хощю погубити, но хощу спасти и в 
разумъ истины привести", обеща ему паки внити в рай.

А в Паремии именуются 4 рекы, идуть из рая - Тигр, Нил, Фисонъ, 
Ефраксъ - со въстока; Нил же - под Египтомъ, ловять на немъ и силолои, 
течетъ же с высокыхъ горъ, и еже суть от земля и до небеси, а место 
непроходимо есть человекомъ, а верху его рахмане живуть.

А се, брате, в Прилозе всемъ явлено есть, в чюдесех святаго архаггела 
Михаила, что възмяи праведнаго Еноха, посади его въ честномъ раю. А се 
Илия святый и въ раи же седить, находилъ его Агапей святый и часть хлеба 
взял. А святый Макарий за 20 поприщь жилъ от святаго рая. А Ефросимъ
святый былъ в раю, и три яблока принеслъ изъ рая, и дал игумену своему 
Василию, от них же исцелениа многа быша.

И ныне, брате, мнитъ ти ся мысленый рай, но все мыслено мнится 
видениемъ. А еже Христос рече въ Еуангелии о второмъ пришествии, и то ли 
мыслено сказаете? Сущимъ одесную себе речеть: "Приидете, благословении 
Отца моего, наследуйте уготованое вамъ царствие преже сложениа миру". И 
сущимъ ошуюю себе речеть: "Отъидите от мене, проклятии, въ огнь вечный, 
уготованый диаволу и аггеломъ его". "Не вамъ бо, рече, уготовах мукы, но 
диаволу и аггеломъ его".

О тех двою месту великий Иванъ Златаустый рече: "Насади Богъ рай 
на въстоце, а на западе - муки уготова; якоже бо въ цареве дворе утеха и 
веселие, а вне двора - темница".

А се священномученикъ Патрекей глаголеть: "Два места уготова Богъ:
едино исполнено благых, а другое - тмы и огня исполнено".

То же, брате, не речено Богомъ видети человекомъ святаго рая, а мукы 
и ныне суть на западе. Много детей моихъ, новогородцевъ, видоки тому на 
Дышучемь мори: червь неусыпающий, и скрежеть зубный, и река молненая 
Моргъ, и что вода входить въ преисподняя и пакы исходить 3-жды днемь. И 
та вся места мучимая не погибоша, а место се святое како погибе, повежь ми, 
брате, в немь же есть и Пречистая Богородица, и множесьтво святых, еже по 
въскресении Господни явишася многимъ въ Иерусалиме и паки внидоша в рай? 
Речено бо имъ есть: "Уже пламенное оружие не хранить вратъ Едемьскыхъ";
приде бо Спасъ мой, вопия вернымъ: "Внидете паки в рай!"

И се, брате, въ "Блаженнех" молвитъ: "Снеди ради древняя изведе 
из рая врагъ Адама, крестом же разбойника Христосъ в онь введе".

И егда же приближися преставление Владычици нашея Богородица, 
аггелъ вравье принесе, ветви из рая, являя, где ей быти. А еже рай мысленый 
есть, то почто видиму ветвь сию аггелъ принесе, а не мыслену есть? Апостоли 
видеша, множество и неверныхъ жидовъ ветвь ею видеша.

Ни едино же дело Божие есть тленно, но вся дела Божиа нетленна 
суть, самовидець есмь сему, брате. Егда Христос, иды на страсть волную, и 
затвори своима рукама врата градная, - и до сего дни не отворени суть. А егда 
постився Христос надь Ерданомъ, своима очима виделъ есмь постницу его, сто 
фуникъ Христос посадилъ - не движими суть и до ныне, не погибли, ни 
погнили.

Или, брате, имешь себе мыслити, аще насади Богъ на въстоце рай, 
почто обретеся въ Ерусалиме, тело Адамле? То не веси ли, брате, службу 
аггельскую, коль скоро свершають, без износимых речей служать Богу, во 
мьгновении ока землю прорыщуть и небеса преходять? Мощно бо есть Богови 
единемъ словомъ Адама из рая въ Иерусалиме, поставити; и херувиму повеле
хранити врата Едемьская, а по въскресении своемь повеле Адаму въ рай внити 
и множество святых с нимъ. Слово и дело есть въскоре.

А то место святаго рая находилъ Моиславъ-новгородец и сынъ его 
Ияковъ; а всех ихъ было три юмы, и одина от нихъ погибла, много блудивъ, 
и две ихъ потомъ долго носило море ветромъ, и принесло ихъ к высокымъ 
горамъ. И ведеша на горе той написанъ Деиисусъ лазоремъ чюднымъ и велми 
издивленъ, паче меры, яко не человечьскыма рукама творенъ, но Божиею 
благодатью. И светъ бысть в месте томъ самосияненъ, яко не мочи человеку 
исповедати.

И пребыша долго время на месте томъ, а солнце не виде, но светъ 
бысть многочасьтный, светлуяся паче солнца. А на горахъ техъ ликованиа 
многа слышахуть, и веселия гласы поюща. И повелеша единому другу своему 
взыти по шегле на гору ту, видети свет-отъ и ликованныя гласы; и бысть, яко 
взиде на гору ту, и абие въсплеснувъ руками, и засмеяся, и побеже от друговъ 
своих к сущему гласу. Они же велми удивьлешеся, и другаго послаша, запретивъ
ему, да обратився скажет имъ, что есть бывшее на горе. И той тако же 
сътвори, нимала възвратися къ своимъ, но с великою радостию побеже от них. 
Они же страха исполнишася, и нача размышляти в себе, глаголюще: "Аще ли 
смерть случится, но ведели быхомъ светлость места сего". И послаша третиаго 
на гору, привязавъ ужищи за ногу ему. И тако же и тотъ въсхоте сътворити:
въсплескавъ радостно и побеже, в радости забывъ ужища на нозе своей. Они 
же здернуша его ужищомъ, и томъ часу обретеся мертвъ. Они же побегоша 
въспять, не дано есть имъ дале того видети, светлости тое неизреченныи, и 
веселия, и ликованиа тамо слышащаго. А тех, брате, мужей и нынеча дети и 
внучата добри-здорови.

А что, брате, молвишь: "Рай мысленый", ино, брате, такъ то и есть 
мысленый и будет, а насаженый - не погыблъ, и ныне есть. На нем же светъ 
самосияненъ, а твердь запята есть до горъ техъ раевых.

А мысленый рай то и есть, брате, егда вся земля огнемъ искушена 
будетъ, по апостольскому словеси: "Чаем небесъ новых и земли новые, егда 
истинный светъ - Христос - сниде на землю".

Размысли себе, брате: коль светелъ светъ именуется в Бытии, запятый 
твердью, паче же того дивнее и светлее светъ Христос истинный есть, а с ним 
9 чиновъ светли суть, служать ему: 1 чинъ - аггели, 2 чинъ - архаггели, 
3 - начала, 4 - власти, 5 - силы, 6 - престоли, 7 - господьствие, 8 - 
херувими многоочитии, 9 - серафими шестокрилатии. Егда Господь нашь 
явится съ светлостью божесьтва своего на земли и силы небесныа двигнутся,
аггели престануть от делъ своихъ и явять светлость свою, сътвореную 
от Бога, то есть, брате, мысленый рай, егда вся земля просвещена будеть
светом неизреченнымъ, исполнена радости и веселия, якоже апостолъ 
Павелъ глаголеть, егда въсхищенъ бысть до третиаго небеси: "Око не веде, и 
ухо не слыша, ни на сердце человеку не взиде, еже уготова Богъ любящимъ его".

О семъ раю мысленомъ Христос рече: "Суть етери от зде стоящихъ, 
иже не имуть вкусити смерти, дондеже узрять царствие Божие, пришедша в 
силе". То суть, брате, видевьши царствие Божие: Моисей и Илья, Петръ, 
Ияковъ, Иоаннъ на Фаворьстей горе; якоже видевше ученици его, удариша 
собою о перстную землю, не могуще видети светлости божества его.

Не возможно бо его, брате, ни святымъ видети мысленаго рая, въ 
плоти суще, того ради сие святии видевши, не могоша стояти, ниць на землю 
падоша.

И ты, брате Феодоре, о семъ словеси не смущайся; рай на въстоце 
не погиблъ, созданный Адама ради. И сими словесы уверися, брате, и весь 
священный соборъ тако научи и укрепи сице мудрствовати, якоже ти 
изъявихъ отъ Божественного писания в семъ послании.

Миръ и любовь о всемогущемъ Бозе, Господе нашемъ Исусе Христе, 
емуже слава во веки. Аминь.