В августе 1395 г. Тимур (1336-1405), совершая поход против
Золотой Орды, неожиданно вышел к Ельцу, разграбил его и, 
простояв у Дона около двух недель, по неясным причинам повергул 
обратно, занявшись разгромом Астраханских и Крымских улусов.
На Руси это событие было воспринято как чудо, совершённое иконой 
Владимирской Богоматери, как раз в это время перенесённой в Москву.
В память об этом на месте встречи иконы был основан Сретенский монастырь.
---------------------------------------------------------------------------


МЕСЯЦА АВГУСТА 26, НА ПАМЯТЬ СВЯТЫХЪ МУЧЕНИКЪ АНДРЕЯНА И НАТАЛЬИ
ПОВЕСТЬ ПОЛЕЗНА ОТ ДРЕВНЯГО ПИСАНИЯ СЛОЖЕНА,
ЯВЛЯЮЩИ ПРЕСЛАВНАГО БЫВШАГО ЧЮДЕСИ
О ИКОНЕ ПРЕЧИСТЫЯ БОГОРОДИЦА, ЕЖЕ НАРИЦАЕТСЯ ВЛАДИМЕРЬСКАЯ,
КАКО ПРИДЕ ОТ ВЛАДИМЕРЯ ВЪ БОГОЛЮБИВЫЙ ГРАД МОСКВУ,
ИЗБАВИ НАСЪ И ГРАД НАШЬ ОТ БЕЗБОЖНАГО И ЗЛОВЕРНАГО
ЦЕСАРЯ ТИМЕРЬ АКСАКА


Господи, благослови, отче!

Въ лъто 6903, во дни княжения благовернаго и христолюбиваго великого князя 
Василья Дмитреевича, самодержьца Рускои земли, внука великого князя 
Ивана Ивановича, правнука великого князя самодержьца Иоанна Даниловича,
при благолюбивемъ архиепископе Куприяне, митрополите киевьскомъ всея Руси, 
въ 15 лето царство Тахтамышева, а 7 лето княжения великого князя Василья 
Дмитреевича, а индикта въ 3, а въ 13 лето по татарщине, по московьскомъ 
взятьи бысть замятия велика в Орде.

Прииде некоторый цесарь Темирь Аксакъ со восточные страны, отъ 
Синее Орды, от Саморхиискыя земли, велику брань створи, много мятежь 
воздвиже въ Орде и на Руси своимъ приходомъ.

О семъ убо Темире Аксаце поведаша, яко исперва не цесарь бе родомъ:
ни сынъ цесаревъ, ни племяни цесарьска, ни княжьска, ни боярьска, но тако 
испроста единъ сы от худыхъ людей от заицькихъ татаръ, от Самархийския 
земля, от Синее Орды, еже бе за Железными Враты. Ременьство же кознець 
бе железны, обычаем же и деломъ - немилостивъ и хишникъ, и ябедникъ, и 
грабежникъ. Иже бе преже холопъ у некоего осподаря, егоже за злонравие 
отвержеся осподарь его и, бывъ, отела его от себе; он же, не имея чимъ 
кормитися, пребываше татьбою кормяся.

Единаче бо ему тогда младу сущу, во убожьстве крадый ядяше, иже у 
некого да украде овцю, они же абие очитиша его. Он же мняшеся убежати, но 
скоро многими постиженъ бысть и ятъ бысть, и удержанъ крепко, и биша его 
нещадно по всему телу, и умыслиша ему дати язву смертную, яко да убиють 
и; и перебиша ногу и бедру его на полы, и абие повергоша его яко мертва, 
недвижющася и не дышюше; мняху убо, уже умре, и оставиша его псомъ на 
снедение. Едва уздравися от таковая смертоносныя язвы, въста, перекова себе 
железомъ ногу свою перебитую, таковою нужею храмаше; того ради прозванъ 
бысть Темирь Аксакъ, Темирь бо зовется железо, Аксакъ - хромець; тако 
толмачить половетьскымъ языкомъ, яко таковою виною прозванъ бысть Темирь 
Аксакъ, еже протолкуется Железны Хромець, яко от вещи и делъ звание 
приимъ, по действу имя себе стяжа.

Таже потомъ, по исцеленьи от ранъ, по великих техъ побоехъ, не лишился 
лихого своего обычая перваго, не смирися, ни укротися, но паче на болшее 
совращеся: горее давнаго и пущи прежняго бысть лютъ разбойникъ. Потомъ 
же къ нему приложишася уноши немилостивии, мужие сурови, вси злии человеци, 
подобници ему, таковии же разбойници и хищници - и умножишася зело. 
И егда их бысть числомъ яко сто, и нарекоша его надъ собою старийшину 
разбойникомъ; и егда бысть ихъ числомъ яко и до тысящи, тогда уже княземъ его 
зваху; и егда ихъ боле умножишася, паче числомъ, много земли поплени, многи 
грады и цесарства поималъ, тогда же царя его у себя именоваху.

Сий же Темирь Аксакъ нача многи рати творити и многи брани въздвиже, 
многи победы учини, многимъ полкомъ спротивнымъ одоле, многи грады 
раскопа, многи люди погуби, много страны и земли повоева, многи области и 
языки поплени, многи княжения и цесарьства покори подъ себе; цесаря турьска 
Крещия полонилъ и цесарство за ся взялъ. А се имена темъ землямъ и темъ 
цесарствомъ, еже бе попленилъ Темирь Аксакъ: Чагадай, Хорусании, Голустаини, 
Китай, Синяя Орда, Ширасъ, Испагань, Ориначь, Гиненъ-Сизъ, Шибренъ, 
Шамахии, Савасъ, Арзунумъ, Тефлизий, Тевризий, Горзустаний, Обезний, 
Багдат, Тимиръ Кабы, рекши Железная врата, и Асурию, и Вавилоньское цесарство, 
идеже былъ Навходонасоръ, иже пленилъ Иерусалимъ и три отрока - 
Ананью, Азарья, Мисаила и Данила пророка, и Савастию-градъ, идеже было 
мучение святыхъ мученикъ 40, иже в Севастии, и Арменею, идеже былъ святый 
Григорий, епископъ великия Арменея, Дамаскъ великий, и Сарай великий - 
сия имена темъ землямъ и темъ градомъ, и темъ цесарствомъ, над ними же 
цесарствова Тимирь Аксакъ; со всехъ техъ земль дани и оброки дають ему, во 
всемъ ему повинующися. Онъ же на многи брани хожааше, ани съ нимъ воююще 
пленяше многи земля, они же во всемъ повинующеся ему и хожаше с нимъ, 
всюде волю его творящи; цесаря Крещия турьскаго въ клетце железне вожаше 
с собою, того ради, да аще бы видели многи земли таковую силу и славу 
безбожнаго врага и гонителя.

Прииде ратью на цесаря Тактамыша, и бысть имъ бой на месте, нарицаеме 
Ораиньскомъ, на кочевищи цесаря Тактамыша; и прогна цесаря Тактамыша. 
Оттоле възгореся оканный, нача мыслити въ сердци своемъ тако 
и Рускую землю попленити, аки преже сего, за грехи попустившю Богу, 
поплени цесарь Батый Рускую землю, а гордый и свирепый Темирь Аксакъ то 
же помышляше, хощетъ взяти Рускую землю.

И собра все вое свое, проиде всю орду и всю землю Татарьскую, прииде 
близъ пределъ Резаньския земля, вся градъ Елечь, и князя елечьскаго изима, 
и многи люди помучи. И се слышавъ, князь Василей Дмитреевичь собра воя 
своя многи, поиде с Москвы и къ Коломне, хоте ити противу ему въ стретение;
пришедъ ратию, ста на брезе у Оки реки. Тимирь Аксаку же стоящю на единомъ 
месте 15 дни, помышля, оканный, хоте ити на всю Рускую землю, аки вторый 
Батый, разорити крьстьяньство.

Слышавше благоверный христолюбивый великий князь Василей Дмитреевичь, 
самодержьць Руския земли, помышьление оного беззаконнаго и свирепаго 
и гордаго мучителя и губителя Аксакъ Темиря цесаря, како помышляше 
на православну веру, боголюбивый же великий князь Василей Дмитреевичь, 
руци на небо воздеющи, со слезами моляхуся, глаголюще: "Создателю 
и заступниче нашь, Господи, Господи, призри от святаго жилища твоего, виждь 
смири онаго варвара и сущих с нимъ, дерьзнувшихъ хулити святое великолепное 
имя твое и пречистыя всенепорочныя твоея Матери! Заступниче нашь Господь, 
да не речеть: "Где есть Богъ ихъ?" - ты бо еси Богъ нашь, иже гордымъ 
противляяся! Стани, Господи, в помощь рабомъ твоимъ, на смиреныя своя рабы 
призри! Не попусти, Господи, сему оканному врагу поносити нас, твоя бо держава 
неприкладна и цесарство твое нерушимо! Слыши словеса варвара сего, избави насъ 
и град нашь от аканнаго и безбожнаго цесаря Темирь Аксака".

Князь же великий Василей Дмитреевичь посла весть къ отцю своему, 
боголюбивому архиепископу Купреяну, митрополиту киевьскому всея Руси, 
чтобы народу повелелъ прияти пост и молитву, съ усердьемь и слезами Бога 
призывати. Пресвященный же Купреянъ, митрополитъ киевьски всея Руси, 
слышавъ таковую речь от господина своего великого князя Василья Дмитреевича, 
и призва к собе вся архимандриты и игумены и повеле пети по всему 
граду мольбены, и дети своя духовныя повеле имъ наказати, дабы постъ прияли 
и молитву съ усердиемъ, и покаяние от всея души своея. Сам же пресвященный 
Кипреянъ митрополитъ, такоже по вся дни призывая к собе благоверныя князи, 
благочестивыя княгини и вся властели и воеводы, по всякъ час наказая их, 
учаше; сам же Купреянъ митрополитъ по вся дни и часъ от церкви не отступая, 
принося молитвы къ Богу за князь и за люди.

Такоже повеле князь наместникомъ своимъ и властельмъ, и воеводамъ градскимъ 
укрепити осаду и собрати воя вся. Они же, слышавъ повеление господина своего, 
собраша люди и весь град, и укрепиша осаду.

Благоверный же великий князь Василей Дмитреевичь, помянувъ избавление 
царствующего града, како избави пречистая владычица наша Богородица 
цесарствущий градъ отъ нашествия зловернаго царя Хоздроя, помянуве 
послати по икону Пречистыя. Боголюбивый же Кипреянъ, митрополитъ 
киевьский всея Руси, слышавъ такую речь от господина своего великого 
князя Василья Дмитреевича, посла въ старый и славный градъ Володимерь по 
икону владычица наша Богородица клирики же великия соборныя церкви 
святыя Богородица иже въ Володимери. Протопопъ свещася с крилошаны, 
Пречистую чюдную икону взяша и понесоша от града Владимеря на Москву, 
страха ради Тимирь Аксакова татарьска, егоже иногда в повестехъ слышахомъ 
далече суща под въстоки солнечными, ныне же близъ, яко при дверехъ, 
приближился - и готовится, поощряется на ны зело. И бысть тогда, 
месяца августа въ 15 день, в самый праздникъ честнаго Успения пречистыя 
владычица нашея Богородица, приснодевица Марья, изыдоша на провожение 
чюдныя тоя иконы, юже проводиша честно, с верою и любовию, съ страхомъ 
и желаниемъ, с плачемъ, далече шествующа, от великия веры многия слезы 
изливаше.

Егда же принесена бысть икона си близъ града Москвы, тогда весь град 
изиде противу иконы на сретение ю, и стретоша ю честно Кипреянъ митрополитъ 
съ епискупы и архимандриты и съ игумены и дьяконы, со всемъ крилосомъ 
и причтомъ церковнымъ, с черноризьци и съ черницами, съ благоверными 
князи, съ благоверными княгинями, и съ бояры, и съ боярынями, мужи и жены, 
уноша, девы, и старци со унотами, дети, младенци, сироты и вдовици, нищи и 
убозии, всякъ възраста мужеска полу и женьска, от мала и до велика, все много 
множество бесчисленое народа и люди, со кресты и съ иконами, съ евангелии 
съ свещами, и съ кандилы, со псалмы и песньми и пеньи духовными, паче же 
рещи - вси со слезами, малии и велици, иже не обрести человека не плачющася, 
но вси съ молитвою и с плачемъ, вси воздыхании немолчными и рыданиемъ 
и благодарениемъ руци воздеющи на высоту, вси моляхуся къ святей Богородици, 
вопиющи и глаголющи: "О всесвятая владычица Богородице! Избави насъ и град 
нашь Москву от нахожения поганаго Темирь Аксакъ царя, и всякъ град 
крестьяньский и страну нашю защити, и князя и люди от всякого зла заступи, 
град нашь Москву от нахожения ратных иноплеменных, избави пленныя наша 
от поганых, от огня и меча, и напрасныя смерти, и от нынешня одержащия скорби, 
и от печали, нашедшей ныне на насъ, от настоящаго гнева и беды, и нужа, 
от предлежащихъ сихъ искушений избави, Богородице, своими богоприятными 
молитвами къ Сыну своему и Богу нашему, своимъ пришествиемь еже къ намъ, 
к нищимъ и убогимъ, и скорбящимъ, печалующимся; умилосердися, госпоже, 
на скорбящия рабы твоя, на тя надеющеся не погибнемъ, но избудемъ тобою 
от врагъ нашихъ; не предай же нас, заступнице наша и надежа наша, в руце 
врагомъ татаромъ, но избави нас от врагъ наших, противных советъ разори 
и козни ихъ разруши; во время скорби нашея нынешняя, нашедшей на ны, буди 
теплая заступнице и предстателници; до от нынешней беды тобой избавльшися, 
благодарно вопиемъ: "Радуйся, заступница наша непостыдная!""

Тако Божиею благодатию неизреченныя милости, молитвами святыя 
Богородица, град нашь Москва целъ и сохраненъ бысть, а Темирь Аксакъ царь 
возратися въспять, поиде въ свою землю. Оле преславное чюдо! О превеликое 
удивление! О многое милосердие к роду крестьяньскому! Въ который день 
принесена бысть икона пречистыя Богородица из Володимеря на Москву, и 
в той день Тимирь Аксакъ царь убояся и устрашися, и ужасеся, и смятеся, и 
нападе на нь страхъ и трепетъ, вниде страх въ сердце его и ужасъ в душю 
его, вниде трепетъ в кости его, и скоро отвержеся и охаби воевати Руские 
земли, и въсхитишася быстрие путнаго шествия, и скорее грядяху к орде, а к 
Руси тылъ опоказующи, и обратися съ сродници своими въсвояси; возвратишася 
безо успеха, възмятошася и въсколебашеся, аки некими гоними быша. 
Не мы бо их гонихомъ, но Богъ прогони изъ невидимою силою своею и 
пречистыя его Матери, скорыя заступници наша въ бедахъ, и молитвою 
угодника его, боголюбиваго пресвященнаго Петра, митрополита киевьскаго 
всея Руси, крепкаго заступника граду нашему Москве и молебника граду 
нашему Москве находящия на ны беды; посла на нихъ страхъ и трепетъ, да 
окаменеются.

Якоже древле при Езикеиле цари и при Исаии пророце Сенахиримъ, 
царь асурийский, прииде на Ерусалимъ ратью, зело похваляяся в гордости 
велице и на Бога вседержителя хулныя глаголы възмущая; царь же Езикеиль 
тогда боляще, но аще боленъ бе, помолится къ Богу со слезами, купно съ 
пророкомъ Исаиемъ и со всеми людми - услыша Богъ молитву ихъ, паче же 
Давыда ради угодника своего, посла Богъ ангела своего, мню великого 
архангела Михаила, абие в ту нощь ангелъ Господень уби от полка асурийска 
100 и 80 и 5 тысяч; наутреи же въсташа, обретоша мертва трупия лежаща; царь же 
асурийский Сенахиримъ убояся зело и устрашися, со останочными своими вои 
скоро отбежа въ Ниневгию град, и тамо от своихъ детей убьенъ бысть и умре. 
Якоже тогда при Сенахириме было, тако и ныне при Темирь Аксацъ, единъ тот 
же Богъ тогда и ныне, едина благодать Божия действуеть тогда и ныне. 
Милостивъ бо есть Богъ и силенъ, елико хощетъ - и можетъ, еще ныне 
милостивъ на насъ, яко избавил ны Господь изъ рукы врагъ нашихъ татаръ, 
избавилъ ны еси от сеча и от меча, и от кровопролития: мышцею силы своея 
разгналъ еси враги наша, сыны Агарины, рукою крепкою и мышцею высокою
устрашилъ еси сыны Измаиловы; не наши воеводы прогнаша Темирь Аксака, 
не наши воиньства пострашили его, но силою невидимою нападе на нь страх и 
трепетъ, страхомъ Божьимъ устрашился гневомъ Божимъ гонимъ бе, подщався 
и отиде от Руския земля, отступивъ поиде прочь отнюду же прииде, земли 
Рустей отнюду же не прикоснуся, ни оскорби, ни остужи, ни вреди ея, не поиде 
безъ врата. Мы же въстахомъ и прости быхомъ, онъ же заиде исчезе; мы 
ожихомъ и прости быхомъ, помощь наша от Господа, сотворшаго небо и землю.

Слышав же благоверный великий князь Василей Дмитреевичь отшествие оканнаго 
и зловернаго царя Темирь Аксака, возратися въспять въ свою вотчину, 
в град Москву, и сретоша его боголюбивый Кипреянъ, митрополитъ киевьски 
всея Руси, со кресты и с иконами, со архидьяконы и съ архимандриты, 
игумены и с попы и дьяконы, весь народъ крестьяньски с радостию велию. 
Благоверный же великий князь Василей Дмитреевичь и святитель, и вси народи 
со слезами руки на небо воздеющи и благодарение вопияху, глаголюще:
"Десница твоя, Господи, прославися въ крепости, десная твоя, Господи, рука 
сокруши враги, и множествомъ славы твоея стерлъ еси супостаты наша" - 
убо безумный Темирь Аксакъ со множествомъ бесчисленыхъ вой пришедъ, съ 
срамомъ отиде.

Благоверный же великий князь Василей Дмитреевичь въшедъ въ храмъ 
пречистыя владычица наша Богородица, видевъ чюдотворную икону пречистыя 
владычица наша Богородица Владимерьскую; пад любезно пред лицемъ образа 
иконы, пролья слезы сердечныя от очию своею и глаголаше: "Благодарю тя, 
госпоже пречистая пренепорочная владычица наша Богородица, крестьяньская 
державная помощница, еже о нас заступленье и крепость показа; избавила еси, 
госпоже, нас и град нашь отъ зловернаго цесаря Темирь Аксака". Благоверный 
же великий князь Василей Дмитреевичь и боголюбивый архиепискупъ Кипреянъ, 
митрополитъ киевьски всея Руси повеле въскоре на томъ месте, где
сретоша чюдную икону пречистыя Богородици, поставити церковь во имя 
пречистыя Богородици честнаго ея Сретения на воспоминание таковаго великаго 
благодарения Божия, да не забудутъ людье делъ Божиихъ. Сию же церковь 
свеща самъ митрополитъ, устроиша монастырь, и повели ту быти игумены и 
братии. И оттоле уставиша праздникъ праздновати месяца августа въ 26 день, 
на память святыхъ мученикъ Андреяна и Наталии. Сия же чюдная икона 
Святыя Богородица написана бысть отъ руки святаго апостола и евангелиста 
Луки. Мы же, грешнии раби Христови, слышавше сие удивление Господа 
нашего Исуса Христа и пречистыя его матери Богородици, понудихъ сия 
писанию предати въ славу имени Господа нашего Исуса Христа и пречистыя 
его матери, владычици нашея Богородици, заступници роду крестьяньскому. 
Тоя молитвами, Христе Боже нашъ, помилуй насъ ныне и присно и въ веки 
вековъ. Аминь.